文／呂秋蓉
桃園市平鎮區人，客語薪傳師，本戴在平鎮，感謝邱鴻春先生指導客語寫作（四縣腔）
阿滿係𠊎這生人最敬愛个人，降有五個妹仔兩個倈仔，雖然生活當艱苦，毋過佢摎𠊎兜養育成人，平常對𠊎兜當溫柔、當有耐心，就係𠊎最尊敬个阿姆。
佢出世在龍潭好額人家，係屋下滿妹仔，上屋阿伯姆做媒人，嫁到霄裡耕種人家，摎佢原來个生活完全無共樣。因為阿婆降十個倈仔兩個妹仔，堵好一打，阿爸座第二，做心臼儕愛輪煮，三日輪一轉，緊工時一日愛煮五餐，無輪著儕愛畜豬仔、雞鴨、剁豬菜、剁菜蓋、刨豆餅、炆豬菜等等，正經愛兜人飯碗無恁該！
成時去菜園，𠊎兜就坐在菜籃肚暢靂靂仔，阿姆笑等講：「來个時節㧡你兜，轉就愛自家行，因為𠊎愛㧡菜」，看著菜園肚个菜瓜、瓠仔，一條條結到重鈂鈂仔，還有脆又嫩个菜筍、蕹菜、角菜、 豆仔，全部都係阿姆皺皺个雙手種个，看著阿姆背痀痀仔，滿手泥沙个身影，心肝肚盡毋盼得也盡感激。
佢還會教𠊎兜二十四節氣知識：「清明前好蒔田、清明後好種豆，係無就黃秧落田難轉青哩。」這兜經典个俗諺語，係老輩人留下最珍貴个智慧。
有一擺老妹愛𠊎把風，偷摘路脣細花瓜仔，結果主人堵好經過，馬仔蹶壁，壞蹄哩，𠊎兜死無命了，該個人跋起腳走去投阿姆，阿姆隨手擎起竹仔賞𠊎兜，阿姆哀還痛哦！下二擺毋敢哩，記得這係第一擺分佢打，也係最尾一擺，過後低言細語講道理分𠊎兜聽，還當嚴肅講：「細時偷摘瓠、大時偷牽牛。」這兜話深深印在𠊎个腦膈肚，教會𠊎兜做人愛正直愛篤實。
國中畢業後，阿爸緊叮嚀：愛去工廠上班賺錢相添，𠊎就去建教合作。無幾久鄰舍大姊問阿姆，阿伯姆，若妹仔愛去織布工廠上班無？一隻月有一千八百個銀，𠊎聽著耳卻卻仔，決定跈大姊去埔心紡織廠，每隻月領著个錢，全部交分阿姆，分佢凝家用。雖然艱苦，毋過𠊎知，這係阿姆辛苦養育𠊎兜最好个回報。
包尾又在細人長大上班後，去讀了高中、空中大學，接等又去讀南亞學院研究所，阿姆當暢講，後生時節無書好讀，這下你完成心願了，每擺想著佢燦爛滿足个笑容，𠊎就當歡喜。
到今想起來，阿姆就像一頭大樹，無埋怨為𠊎兜遮風避雨。佢用粗刻刻个雙手來畜歸家，用嚴格个教示拗搵𠊎兜人格，無靚靚个語言、身裝，單淨自家做模範，總係講做人愛煞猛、老實、愛有愛，佢就係𠊎心肝肚永遠个榜樣，也係最深个感動摎驕傲，阿姆𠊎愛你。
華語
阿滿是我這輩子最敬愛的人，她生五個女兒兩個兒子，雖然生活很辛苦，不過她把我們養育成人，平常對我們很溫柔、很有耐心，她就是我最尊敬的媽媽。
她出生在龍潭富裕人家，是家裡的小女兒，鄰居伯母做媒，嫁到霄裡耕田人家，這跟她原來生活完全不一樣。因為祖母生十個兒子兩個女兒，剛好一打，爸爸排行老二，做媳婦要輪流煮飯，三天輪一次，農忙時一天要煮五餐，沒輪到的人要養豬、雞鴨、剁地瓜菜、剁菜葉、刨黃豆餅、煮大鍋豬菜等等，真的要端別人家的飯碗可不簡單！
有時候去菜園，我們就坐在菜籃裡超開心的，媽媽笑著：「來的時候挑你們，回家就愛自己走，因為我要挑菜」，看著菜園裡的絲瓜、瓠瓜，一條條果實壘壘，還有脆又嫩个菜筍、空心菜、菠菜、 豆子，全部都是媽媽皺皺的雙手種的，看著媽媽彎腰駝背，滿手泥沙的身影，心裡頭很捨不得也很感激。
她還會教我們二十四節氣知識：「清明節前可插秧、清明節後可種豆，否則秧苗枯黃就枉然了。」這些經典的俗諺語，長輩耆老留下最珍貴的智慧。
有一次妹妹要我把風，偷摘路邊小黃瓜，結果主人正好經過，馬失前蹄糟糕了，我們死定了，那個人拔腿跑去向媽媽告狀，她隨手拿起竹鞭犒賞我們，我的媽呀好痛哦！下次敢領教，記得這是第一次被打，也是最後一次，過後她輕聲細語講道理給我們聽，還很嚴肅：「小時候當小偷、長大後變本加厲。」這些話深深烙印在我腦海裡，也教會我們做人要正直要老實。
國中畢業後，爸爸一再叮嚀：該去工廠上班賺錢錢貼補家用，我就參加建教合作。不久鄰舍大姊問媽媽，伯母，你女兒要去紡織廠上班嗎？一個月一千八百元，我聽了豎起耳朵，決定跟大姊去埔心紡織廠，每個月領到薪資，全部交分媽媽讓她持家用。雖然辛苦，不過我知道，這是媽媽辛苦養育我們最好的回報。
最後又在小孩長大上班後，去唸了高中、空中大學，接著又去唸南亞技術學院研究所，媽媽超高興說，以前沒能讓你唸書，現在你終於完成心願了，每每想著她那燦爛滿足的笑容，我就感覺值得了。
如今想起來，媽媽還真像一棵大樹，無怨無悔為我們遮風擋雨。她用粗糙的雙手來養育照顧全家，用嚴厲教誨塑造們端正的品格，她不會自誇、沒有華麗裝扮，總以自己當典範，更調教我們做人要誠實、守信用,心中有愛，她就是我心目中永遠的榜樣，也是最深的感動與驕傲，媽媽我愛您。