文／徐俊文，開南大學國際專修部華語老師（海陸腔）
去泰國教書係𠊎本旦就想愛做个事情，𠊎乜有想過，去到泰國以後，會堵著當多个少數民族，做得認識著佢兜个文化。對學民族學个𠊎來講，係隻跳出頭擺習慣个環境个機會。不過，𠊎嗄無想著，泰國乜回應毋知哪儕人講个：「有日頭个地方就有客人。」在這泰國最北方个省分，在𠊎教書个這隻戴恁多元民族个地方，乜會戴等一大陣个客人。
還記得該日係正到泰國沒幾久，同事渡𠊎騎等自行車就到學校附近點心店食夜。遠遠个就看著頭前黃黃个牌頂有寫漢字，應該係華人菜，想著泰國食恁多日酸酸辣辣个，乜愛換轉𫣆較慣个口味了。𠊎兩儕外國人，企在人店仔前，看等看板頂紅紅个「เย็นตาโฟ（泰文，釀豆腐，Yen tafo）」，毋知係麼个菜就先點下去，係點著毋好食个，就當做係學一擺經驗乜好。凳仔吂坐燒，頭家就兜來兩碗水紅水紅个大麵，頂高放等垤黃黃像油烰个餅，合幾粒魚圓。
雖然係華人開个店，毋過看來頭家這一家大細早就毋會講華語了，看來看去乜無看著老人家好問這係麼个麵。就直接拿等頭家拿个叉仔摎湯匙來食。湯鹹酸鹹酸，還有兜甜甜，啉起來有兜像新竹肉圓頂會加个醬，麵條个泰文喊做「粿條」，應該係潮州話過來个，毋過看來係用米做个，摎𠊎俚个粄條有兜像。食起來雖然當生份，毋過當做淡水阿給來食，乜毋會忒奇怪。酸鹹个味道，乜當適合泰國這翕熱个天時。
食忒以後，𠊎兩儕還係毋知這到底係麼个華人菜，正用手機查看仔這Yen tafo个身世係麼个。一查著驚下，原來這Yen tafo就係海外當有名个客家菜——釀豆腐。毋過來到泰國个釀豆腐，泰國人試著味緒毋罅，就摎豆腐乳加落湯裡肚，正會變做這滿𫣆看著个水紅色。後來，加落「粿條」，就變到這滿食个麵，毋過因為當多人毋知Yen tafo係釀豆腐个關係，所以當多頭家就嗄摎最重要个豆腐拿忒去，變到這意外「有名無實」个特殊客家菜。下二擺，大家到泰國定著愛記得試看仔這特殊个客家風味。
華語
去泰國教書是我本來就想要做的事情，我也有想過，去到泰國以後，會遇到很多的少數民族，可以認識他們的文化。對於學習民族學的我來說，是個跳出舒適圈的機會。不過，我卻沒有想到，泰國也會回應不知道誰說的那句話：「有太陽的地方就會有客家人。」在泰國這最北方的省份，在我教書的這個住了這麼多元民族的地方，也會住著一群客家人。
還記得那天是剛到泰國沒多久，同事帶我騎著腳踏車就到學校附近的麵店吃晚餐。遠遠地就看到前面黃黃的招拍上有寫著漢字，應該是華人菜，想在泰國吃了這麼多天酸酸辣辣的，也要換換我們比較習慣的口味了。我們兩個外國人，站在人家店門口，看著看板紅紅的เย็นตาโฟ（Yen tafo），不知道是什麼菜就給他先點了下去。反正點到不好吃的，就當作是一次經驗吧。椅子還沒坐熱，老闆就端來兩碗粉紅粉紅的湯，上面放著塊黃黃的油炸餅，配著幾顆魚丸。
雖然是華人開的店，不過看來老闆一家都已經不會講華語了，看來看去也沒看到老人家可以問這是什麼面。索性就直接用店家給的叉子和湯匙吃了起來。湯鹹酸鹹酸，還有些甜甜的，喝起來有點像是新竹肉圓淋在上面的醬汁，麵條泰文叫作「粿條」，應該是從潮州話翻過來的，不過看起來是用麵做的，跟我們的板條還有點像。吃起來雖然很陌生，不過當作淡水阿給來吃的話，也不會太奇怪。酸鹹的味道，也很適合泰國這悶熱的天氣。
吃完以後，還是不知道這到底是什麼華人菜的我們，才用手機查查看這Yen tafo的身世是什麼。一查嚇一跳，原來這Yen tafo就是海外很有名的客家菜——釀豆腐。不過來到泰國的釀豆腐，泰國人覺得不夠味，就把豆腐乳加到湯哩，才會變成現在我們看到的粉紅色。後來，加進「粿條」，就變成現在吃的麵，不過因為很多人不知道Yen tafo係釀豆腐的關係，所以很多老闆就把最重要的豆腐拿掉，變成這意外「有名無實」的特殊客家菜。下一次，大家到泰國一定要記得試試看這特殊的客家風味喔！